上海儿童福利院搿故事(一)
我一直想拿我有搿朋友介绍拨大家晓得晓得,藏勒嗨只有我一个人晓得,显得忒自私嘞,推荐拔大家一道晓得,时尚搿讲法叫【资源共享】嘛,几乎好。
这位姓瞿搿朋友是我伲搿同龄人,伊,是【上海儿童福利院】搿医生,我尊称伊瞿老师。一趟偶然搿机会我认得了伊,通过伊,我走进了【上海儿童福利院】搿大门……
发自我内心搿讲,认得瞿老师是我人生中搿一个转折点,伊让我学会了深层次搿看人性。伊搿心态、伊搿工作态度及工作环境、伊搿思想境界、还有伊做人搿理念,可以讲邪气平凡但又是邪气搿与众不同。伊,代表了【上海儿童福利院】全体工作人员搿精神境界。
有一句闲话我要先讲一讲,无论是电话里搭伊交流还是搭伊见面聊,我每趟侪会勿知勿觉搿眼眶里含勒眼泪搿听伊讲,顺至于到后来我有一种想哭搿冲动(我想,要么是我忒容易激动啊?还是瞿老师讲搿话题真搿忒感人呢?…)
前面我介绍过,瞿老师了勒【上海儿童福利院】是搿医生,也是【上海儿童福利院】搿一位有资历搿老师,伊了勒小朋友当中邪气有威信,老受小朋友、同学搿欢迎搿,当然,了勒院里搿领导班子里,瞿老师也占一席之地,同时,院里搿一切对外联络工作,瞿老师赛过形象代言人。
对于孤儿与弃儿,平常辰光大家勿会详细搿去研究迭个概念,了勒此地,我有义务首先帮各位解释一下。孤儿,是呒没父母,但是,一定有祖父祖母或者有外祖父外祖母及叔叔、姑姑,阿姨舅舅等。弃儿,就与孤儿有实质性搿区别。弃儿,因为身体浪有先天搿缺陷,当伊一落地来到迭个世界搿辰光,亲身父母就因种种搿原因、种种搿理由拿迭条小生命抛弃了……
换句闲话讲,弃儿,是有父母搿!
2011年11月28日
评论